نهار تكون دايز من هاد البلاصة، ولا واقف كتاكل شي كاسكروط في المركز، ولا كتشرب قهوة حدا الطريق، تصنّت مزيان لترابها، وعرف بأن رجليك فوق أرض عندها تاريخ، أرض عاشو فيها شيوخ كبار، وعلماء، ومجاهدين ضحاو بدمهم وأرواحهم باش تبقى هاد الأرض حرة.
هادي ماشي غير محطة ديال الطاكسيات، وماشي غير سوق وطريق كتدي للجديدة ومراكش… هادي أرض “الزاوية”، أرض العلم والجهاد، اللي بدات من الخلاء، وولات اليوم قلب دكالة النابض.
- البدايات وتأسيس زاوية القواسم
قبل ما تكون “زاوية سيدي إسماعيل”، كانت هاد البقعة غير أرض خالية، وممر كيدوزو منو القوافل اللي غادية لمراكش، وآسفي، وكازا، والجديدة.
وفي القرن 16، جا ليها سيدي قاسم بن علي، من قرية أوزكيطة جنوب مراكش، واللي كينحدر من سلالة الشريف الإدريسي، وأسس “زاوية القواسم”. وكانو عندو 4 ديال الولاد: سيدي عثمان، سيدي بوبكر، سيدي بوشربيل، وسيدي أحمد اللي تدفن في رحاب الزاوية.
- سيدي إسماعيل.. منارة القرآن والفقه
من بعد، جا للمنطقة سيدي إسماعيل بن سعيد المشترائي، المعروف بـ “إسماعيل أبو سجدة”، من نواحي مراكش. اختار هاد البلاصة بالضبط حيت جات في ملتقى الطرق، والأرض ديالها خصبة، وزيد عليها الناس كانو محتاجين لشكون يعلمهم أمور دينهم.
تماك بنا الزاوية ديالو، واللي دغيا ولات مدرسة كبيرة كيتقرى فيها القرآن والفقه وأصول الدين، وتخرجو منها بزاف ديال الفقهاء والطلبة ديال دكالة. ومن بعد مماتو تدفن فيها، وسماو البلاصة باسمو، وولات معروفة من داك الوقت بـ “زاوية سيدي إسماعيل”.
- حصن الجهاد ومقاومة البرتغاليين
الزاوية ما كانتش غير للعلم ، بل كانت قلعة ديال الجهاد، فاش كانو البرتغاليين محتلين أزمور والجديدة، كانو كيخرجو للأراضي اللي دايرة بيهم باش يحرثو ويرعاو الماشية ديالهم.
هنا وقف ليهم سيدي إسماعيل، جمع المجاهدين ديال الزاوية، ومنع البرتغاليين من الخروج للحرث والرعي، وغنم الماشية ديالهم.
هادشي خلا صيتو ينتاشر في دكالة كاملة، وولاو الناس كيجيو للزاوية من كل بلاصة باش ينخرطو في الجهاد، حتى وصفوه المؤرخين بأنه كان: “ذابّاً عن حوزة الإسلام، منافحاً عنه ضد من استطال عليه”.
- شيوخ وأعلام في الذاكرة
في الزاوية مدفونين بزاف ديال الشيوخ والصلحاء اللي جمعو بين العلم والجهاد، منهم: سيدي بوعبدلي، أحمد المجاهد، سيدي إبراهيم اللي أسس زاوية مولاي الطاهر القاسمي، مع ولاد سيدي قاسم: سيدي عثمان، سيدي بوبكر، سيدي بوشربيل، وسيدي أحمد.
والفضل الكبير في إعمار المركز والدواوير اللي دايرة بيه والحفاظ على الزاوية كيرجع لأول العائلات والقبائل اللي استقرت فيها، وهما: السواهلة، البحابحة، أولاد سيدي عبد الله بن مسعود، الشواربة، وبني هلال.
- في العصر الحديث.. ملتقى الطرق والهوية اللي ما كتبدلش
في عهد الاستعمار الفرنسي، الفرنسيين منين جاو، اختارو زاوية سيدي إسماعيل مركز صغير، حيت شافو الموقع ديالها استراتيجي وكيربط بين الجديدة، ومراكش، وسيدي بنور، وآسفي.
وفي عام 1963، تبنا فيها “المسجد الأعظم”، وبقات ديما محطة معروفة للمسافرين، وملتقى طرق حيوي كيربط بين الجديدة، آسفي، ومراكش.
ورغم أن الزاوية تبدلات وكبرات مع الوقت، بقات محافظة على الهوية ديالها الأصلية: زاوية العلم، والجهاد، والكرم.
بقلم ابراهيم اشويبة

















































تعليقات الزوار ( 0 )